Takið þátt í að móta Mosfellsbæ framtíðarinnar

Vinna við endurskoðun aðalskipulags Mosfellsbæjar 2002-2024 er langt á veg komin og leggur bæjarstjórn áherslu á virkt samráð við íbúa sveitarfélagsins um endurskoðun aðalskipulagsins. Því er kallað eftir hugmyndum, tillögum og athugasemdum frá íbúum.

Til þess að auðvelda íbúum sveitarfélagsins þátttöku í slíku samráði, hefur verið opnuð skipulagsgátt hér á heimasíðu Mosfellsbæjar, mos.is, undir flipanum skipulagsmál/endurskoðun aðalskipulags.

Þar munu bæjarbúar geta fylgst  með framvindu endurskoðunarinnar og tjáð hug sinn um þær tillögur og álitamál sem upp kunna að koma.  Auk þess verður íbúum gefinn kostur á að hitta kjörna bæjarfulltrúa og skipulagsráðgjafa á óformlegum fundum á fyrirfram auglýstum tímum.

Einnig verður efnt til formlegra íbúafunda eftir því sem verkinu miðar áfram og tilefni verður til. Loks hefur verið virkjað sérstakt netfang; adalskipulag[hja]mos.is þar sem íbúum og öðrum áhugasömum gefst kostur á að senda inn athugasemdir, tillögur og hugmyndir tengdar endurskoðun aðalskipulagsins.

Í upphafi verks er aðaláherslan lögð á endurskoðun  á stefnu og markmiðum sveitarstjórnar í þeim málaflokkum sem aðalskipulagið nær til, þ. e. landnotkun, samgöngum, þjónustukerfi og umhverfismálum. Í þeirri vinnu verða  m. a. eftirfarandi spurningar áleitnar: 

Hvaða eiginleika og yfirbragð á byggðin að hafa?
Hverju þarf að gera ráð fyrir gagnvart atvinnulífinu?
Hverju þarf að gera ráð fyrir gagnvart byggðaþróun í þéttbýli og dreifbýli?
Hvað þarf að verja og hvað þarf að vernda?
Náttúruvernd, minjavernd, auðlindavernd.
Hvernig má bæta lífsgæði íbúanna?

Mosfellingar eru hvattir til að taka þátt í að móta framtíð Mosfellsbæjar og leggja sitt af mörkum til þess að gera góðan bæ enn betri.

Við hvetjum ykkur til að senda póst á adalskipulag[hja]mos.is

Ýmis gögn er varða endurskoðun aðalskipulags:
Þéttbýlisuppdráttur(drög) - pdf, 3,7 MB
Sveitarfélagsuppdráttur(drög) - pdf, 4,1 MB
Greinargerð– Stefna og skipulagsákvæði (drög) pdf, 2,6 MB