Hreyfum okkur saman - Kvennahlaupið 2013 í Mosfellsbæ 8. júní

03/06/2013

Kvennahlaupið 2013 verður 8. júní
Kvennahlaupið í ár er í samstarfi með Styrktarfélaginu Göngum saman. Markmið Göngum saman er að styrkja grunnrannsóknir á brjóstakrabbameini.

Í ár verður Sjóvá Kvennahlaup ÍSÍ haldið 8. júní um allt land í 24. sinn. Hlaupið frá Varmárvelli kl. 11:00.
Vegalengdir í boði: 3 km - 5 km og 7 km. Forskráning í Íþróttamiðstöðinni að Lækjarhlíð.

Frítt í Varmárlaug að loknu hlaupi.

Nú er um að gera að fara að huga að því að koma sér í form, kynna sér hlaupahópa í sínu hverfi og mæta fersk til leiks.

Sjá DAGSKRÁ hlaupsins í Mosfellsbæ nánar hér

SAGAN

Sjóvá kvennahlaup ÍSÍ

Fyrsta Kvennahlaup ÍSÍ var haldið 30. júní árið 1990 í tengslum við Íþróttahátíð ÍSÍ. Hlaupið var í Garðabæ og á 7 stöðum um landið. Á Akureyri, Egilsstöðum, Ísafirði, Laugum í Þingeyjarsýslu, Grundarfirði, Stykkishólmi og í Skaftafellssýslu. Rúmlega 2.000 konur tóku þátt í Garðabæ og um 500 konur á landsbyggðinni. Nú taka árlega um 16.000 konur þátt á 90 stöðum hérlendis og 16 stöðum erlendis.

Markmið Kvennahlaupsins er að hvetja og styðja konur á öllum aldri til aukinnar heilsueflingar. Kvennahlaupið höfðar til allra kvenna þar sem hægt er að velja mislangar vegalengdir. Engin tímataka er í hlaupinu og því ekki hlaupið nema til persónulegs sigurs.

Kvennahlaupið er haldið sem næst kvenréttindadeginum 19. júní þar sem höfðað er til samstöðu kvenna. Innifalið í þátttökugjaldinu er kvennahlaupsbolurinn sem er úr dry-fit efni, með V-laga hálsmáli og verðlaunapeningur.

Frá árinu 2002 hefur verið hlaupið undir ákveðnu þema og slagorði þar sem vakin er athygli á málefnum tengdum heilsu kvenna. Hefur kvennahlaupsnefnd ÍSÍ verið í samstarfi við ýmis félagssamtök eins og Samhjálp kvenna, Beinvernd, Geðrækt, UNIFEM, Hjartavernd, Lýðheilsustöð, Krabbameinsfélagið, Kvennfélagasamband Íslands og Styrktarfélagið Líf.

Sjóvá hefur verið aðalstyrktaraðili hlaupsins frá árinu 1993. Heimasíða Sjóvá Kvennahlaups ÍSÍ er hýst á vef Sjóvá www.sjova.is  Þar er að finna helstu upplýsingar um hlaupið, sögu hlaupsins, hlaupastaði og þema. Inn á vefnum er einnig að finna skemmtileg myndskeið og veglegt myndasafn frá flestum hlaupastöðum kvennahlaupsins frá árinu 2001. Kvennahlaupið er einnig á Facebook.

Til baka