Nýjar reglur um ferðaþjónustu fatlaðs fólks

30/12/2014
Þann 1. janúar 2015 taka gildi nýjar reglur um ferðaþjónustu fatlaðs fólks.

Helstu atriði:
  • Strætó tekur við rekstri akstursþjónustu fatlaðs fólks og aldraðra á höfuðborgarsvæðinu, utan Kópavogs.
  • Markmið Strætó er að veita sveigjanlegri og öruggari þjónustu.
  • Samstarf við hagsmunaaðila er lykilatriði við innleiðingu breytinganna.

Öll sveitarfélög á höfuðborgarsvæðinu, utan Kópavogs, hafa gert með sér samkomulag um sameiginlega akstursþjónustu fatlaðs fólks og aldraðra. Á grundvelli þess var Strætó falið að reka þjónustuna frá og með áramótunum, en Strætó hefur rekið hana í Reykjavík frá árinu 2001.

Aukið öryggi og sveigjanleiki
Markmið Strætó er að tryggja notendum akstursþjónustunnar bæði sveigjanlegri og öruggari þjónustu en þeir hafa áður fengið. Aukinn sveigjanleiki felst meðal annars í því að nú geta notendur pantað ferðir með tveggja klukkustunda fyrirvara í stað eins sólarhrings áður. Þjónustuverið verður opið mun lengur en áður, eða meðan ökutæki fyrirtækisins eru í akstri. Aukið öryggi notenda verður m.a. tryggt með endurnýjun ökutækja akstursþjónustunnar auk þess sem á þeim verða gerðar reglubundnar gæða- og öryggisúttektir.

Gott samstarf lykilatriði
Akstursþjónustuna er umfangsmikil og mikilvæg þjónusta sem snertir marga og því er

góð samvinna og samráð við hagsmunasamtök notenda afar mikilvægt til að tryggja farsæla framkvæmd þjónustunnar. Skipaður hefur verið samráðshópur með fulltrúum frá sveitarfélögunum, Strætó, notendum og þeim sem annast aksturinn. Hlutverk hópsins er að fylgjast með framkvæmdinni og koma með ábendingar um það sem betur má fara. Strætó hvetur einnig notendur til þess að koma á framfæri athugasemdum sínum og ábendingum með símtali í þjónustuver (540 27 00), tölvupósti (thjonustuver@straeto.is) eða í gegnum vefsíðu Strætó (www.straeto.is). Allar ábendingar og athugasemdir eru skráðar og unnið úr þeim eins fljótt og kostur er.

Ábyrgð á þjónustunni

Samkvæmt samkomulagi sveitarfélaganna er ábyrgð á akstursþjónustunni tvískipt: Félagsþjónusta hvers sveitarfélags ákvarðar hverjum er heimilt að nota þjónustuna, ákveður fjölda ferða á hvern notenda og hvaða þjónustu notandinn á rétt á. Ábyrgð Strætó felst í að framkvæmd akstursþjónustunnar sé í samræmi við ákvarðanir sveitarfélaganna.

Nánari upplýsingar

Upplýsingabæklingur Strætó um akstursþjónustuna á höfuðborgarsvæðinu er aðgengilegur á Þjónustumiðstöðum Reykjavíkurborgar, þjónustuverum Hafnarfjarðar, Garðabæjar, Mosfellsbæjar og Seltjarnarness auk þess sem hann er að finna á heimasíðu Strætó.

Allar frekari upplýsingar veitir Smári Ólafsson sviðsstjóri akstursþjónustu í síma 666 2800 eða smari@straeto.is 

 


Akstursþjónusta — panta ferð

Ferðir eru pantaðar og afpantaðar á vefslóðinni www.straeto.is/akstursthjonusta eða hjá Þjónustuveri Strætó í síma 540 2700. Þjónustuver Strætó er opið alla virka daga milli kl. 6:30 og 24:00, á laugardögum milli kl. 7:30 og 24:00 og á sunnudögum milli kl. 9:30 og 24:00. Tekið er á móti rafrænum pöntunum allan sólarhringinn. Fyrir flóknari pantanir, eða ef panta á fyrir marga farþega í einu, getur verið þægilegra að nota netfangið pontun@straeto.is.

Hægt er að panta ferð með tveggja tíma fyrirvara. Ef ferð á að hefjast fyrir kl. 9:30 að morgni þarf pöntun að hafa borist fyrir kl. 20:30 kvöldinu áður. Hægt er að afpanta ferð með að lágmarki tveggja tíma fyrirvara í gegnum sömu leiðir og nefndar eru í fyrri punkti. Ef ferð er afpöntuð með styttri fyrirvara en tveim klukkustundum þá telst ferðin með í uppgjöri.

Ekki er mögulegt að tryggja að hægt sé að veita þjónustu vegna hópferða nema þær séu pantaðar með minnst tveggja sólarhringa fyrirvara. Hópur telst vera fjórir einstaklingar eða fleiri en hver notandi greiðir eftir sem áður fyrir sig.

Til að panta ferð skaltu fylla út form á heimasíðu Strætó 
 

Bæklingur frá Strætó bs. um tilhögun ferðaþjónustunnar á höfuðborgarsvæðinu. 

Strætó bs. sér um framkvæmd sameiginlegrar akstursþjónustu fatlaðs fólks og aldraðra á höfuðborgarsvæðinu. Umsókn um akstursþjónustu fatlaðs fólks og aldraðra skal berast til þjónustumiðstöðvar/félagsþjónustu í því sveitarfélagi sem umsækjandi býr.

Farþega er heimilt að hafa með sér annan farþega. Fargjaldið gjaldfærist á skráðan farþega akstursþjónustunnar.

Geti farþegi ekki ferðast einsamall að mati viðkomandi sveitarfélags, skal aðstoðarmaður fylgja honum. Viðkomandi sveitafélag greiðir laun og annan kostnað aðstoðarmanns. Aðstoðarmaður greiðir ekki fargjald.

Símanúmer Akstursþjónustu Strætó er 540 2700.


  

TENGLAR:

Reglur Mosfellsbæjar um akstursþjónustu fyrir eldri borgara
Gjaldskrá aksturþjónustu eldra fólks
 

Til baka