Íþróttamiðstöðin Lágafell stækkar

30/08/2017

Mosfellsbær hefur undirritað samning við Laugar ehf. (World Class) vegna stækkunar á íþrótta- og líkamsræktaraðstöðu í íþróttamiðstöðinni Lágafelli.
Samningurinn felur í sér að Laugar ehf. mun byggja við núverandi aðstöðu tvo búningsklefa og fleiri hreyfisali. Laugar ehf. mun fara fyrir framkvæmdinni og fjármagna hana að fullu. Tekjumöguleikar íþróttamiðstöðvarinnar aukast talsvert með stækkuninni og gert er ráð fyrir 10% fjölgun gesta á milli ára. 

Hlekkur í heilsueflandi samvélagi
Þjónusta íþróttamiðstöðvarinnar Lágafells er mikilvægur hlekkur í heilsueflandi samfélagi. Mikil starfsemi fer fram í Íþróttamiðstöðinni Lágafelli en þangað voru rúmlega 490 þúsund heimsóknir á síðasta ári. Þar er ein vinsælasta sundlaug landsins auk íþróttasalar og einnig er rekin líkamsræktarstöðin World Class. 

Stækkun á aðstöðu bætir aðstöðu fyrir almennings- og skólaíþróttir og eykur þjónustu við íbúa Mosfellsbæjar. Auk þess eru væntingar um að stækkunin muni hafa jákvæð áhrif á samstarfið við grunnskóla Mosfellsbæjar, Aftureldingu og fleiri aðila sem sækja þjónustu íþróttamiðstöðvarinnar.

Til baka