Viðurkenning fyrir verkefni í þágu fjöl-/tvítyngdra

Ráðstefna um jöfn tækifæri í Erasmus+ fór fram föstudaginn 11. október í Menntaskólanum í Kópavogi. Viðburðurinn var að þessu sinni helgaður málefnum þeirra hópa sem hafa færri tækifæri og vakin athygli á því markmiði Erasmus+ að efla þátttöku þeirra í tækifærum erlendis og í samfélaginu í heild.

Alls hlutu sjö verkefni viðurkenningu, en þau eiga það öll sameiginlegt að stuðla að jöfnum tækifærum. Veittir voru viðurkenningargripir frá handverkstæðinu Ásgarði í Mosfellsbæ, sem er verndaður vinnustaður sem vinnur í anda Rudolf Steiner.

Samtök sveitarfélaga á höfuðborgarsvæðinu (SSH) hlutu viðurkenningu fyrir tvö Erasmus+ verkefni: „Stuðningur til að efla læsi og aðlögun fjöl-/tvítyngdra í grunnskólum“ og „Starfsspeglun í kennslu og aðlögun fjöl-/tvítyngdra í grunnskólum“.

• Innblástur á föstudegi! - Frétt á vef Erasmus+.

Garðabær, Hafnarfjörður, Kópavogur, Mosfellsbær, Reykjavík og Seltjarnarnes hafa á undanförnum árum átt í samstarfi um símenntun grunnskólakennara, sem meðal annars hefur beinst að því að veita kennurum þjálfun og byggja upp reynslu í móttöku og aðlögun barna innflytjenda og flóttamanna í grunnskólunum á höfuðborgarsvæðinu. Um 40 kennarar og starfsmenn skólaskrifstofa hafa heimsótt skóla í Danmörku, Noregi og Svíþjóð með stuðningi frá Erasmus+.

• Myndbönd um verkefnin á YouTube rás Erasmus+ Ísland.

Um leið og sveitarfélögin á höfuðborgarsvæðinu lýstu því yfir árið 2017 að þau væru öll viljug til að taka á móti fleiri flóttamönnum og hælisleitendum vaknaði sú spurning hvernig væri hægt að styðja við kennara í því að taka á móti nemendum úr þessu hópi, kenna þeim og aðlaga að íslensku samfélagi. Nærtækast þótti að sækja í þekkingu og reynslu nágranna okkar á Norðurlöndum og styrkir frá Erasmus+ gerðu það mögulegt skólaárin 2017-2018 og 2018-2019. Alls hafa kennarar úr 34 skólum á höfuðborgarsvæðinu heimsótt um 20 skóla í Danmörku, Noregi og Svíþjóð í gegnum umrædd verkefni. Í kjölfar heimsóknanna hafa þeir síðan miðlað af reynslu sinni til hundruða annarra kennara á höfuðborgarsvæðinu í gegnum fræðslufundi, fyrirlestra og annað kynningarefni.

Sjá nánar um Erasmus+ verkefni SSH:

• Námsferðir til Skandinavíu 2017-2018.
• Kennaraheimsóknir til Norðurlandanna 2017-2018.