Prjónuðu 94 húfur fyrir heimilislausa

22/01/2010
Reykjakotskonur afhenda Samhjálp húfurÍ desember 2009 tók starfsfólk leikskólans Reykjakots í Mosfellsbæ þátt í verkefninu „Hlýjar hendur fyrir börn“ og prjónaði 55 vettlingapör fyrir Mæðrastyrksnefnd. Í framhaldi af því kom fram sú hugmynd að prjóna húfur fyrir heimilislausa Íslendinga. Mikill hugur var í fólki og hófst það átak í lok desember 2009. Að verkefninu komu líka nokkrar áhugasamar konur sem höfðu spurnir af því.

Þann 18. janúar 2010 skilaði starfsfólk Reykjakots af sér 94  húfum til Samhjálpar og Hjálpræðishersins. Gyða Vigfúsdóttir leikskólastjóri segir að hjá þessum samtökum sé unnið frábært og óeigingjarnt starf þar sem fólki sem hvergi á höfði sínu að halla er veitt húsaskjól og fæði. "Starfsmenn þessara samtaka eru flestir sjálfboðaliðar sem gefa vinnu sína til að hjálpa öðrum," bendir Gyða á..

Við leikskólann Reykjakot starfa 33 konur sem hafa gaman af því að koma saman og gera eitthvað í höndunum. "Við hittumst reglulega á prjónakvöldum þar sem þær reyndari kenna þeim reynsluminni. Okkur þykir líka gaman að gefa eitthvað af okkur og leggja góðum málefnum lið," segir Herdís Rós Kjartansdóttir aðstoðarleikskólastjóri.

Húfurnar
Til baka