Viðbragðsáætlanir sveitarfélaga virkjaðar vegna eldgoss

21/04/2010
Eldgos í EYjafjallajökliMosfellsbær hefur í varúðarskyni virkjað viðbragðsáætlanir sínar í samræmi við ákvarðanir Almannavarnarnefndar höfuðborgarsvæðisins, jafnvel þó að hverfandi líkur séu á að öskufall verði á höfuðborgarsvæðinu að mati Veðurstofu Íslands. Er það gert til að tryggja viðeigandi vöktun og undirbúning í ljósi eldgossins í Eyjafjallajökli. Heilbrigðiseftirlit Reykjavíkur fylgist náið með loftgæðum á höfuðborgarsvæðinu fyrir öll sveitarfélög á höfuðborgarsvæðinu og sendir frá sér viðvaranir og leiðbeiningar ef ástæða þykir til.

Almannavarnir hafa gefið út fræðsluefni til íbúa um viðbrögð við öskufalli. Nálgast má skjalið á sérstakri síðu sem Mosfellsbær hefur sett upp vegna viðbragða um hugsanlegt öskufall. Slóðin er mos.is/oskufall.

Viðbragðsteymi Heilbrigðiseftirlits Reykjavíkurborgar fylgist með loftgæðum í borginni allan sólarhringinn í gegnum þrjár mælistöðvar og sendir upplýsingar á tengiliði í sveitarfélögunum á höfuðborgarsvæðinu. Að mati Heilbrigðiseftirlitsins er ekki ástæða til sérstakra varúðarráðstafana vegna hugsanlegs öskufalls á höfuðborgarsvæðinu á þessari stundu. Ennfremur fylgist Heilbrigðiseftirlit Kjósarsvæðis vel með vatnsbólum.

Tryggt verður að allar starfseiningar Mosfellsbæjar fái ítarlegar upplýsingar í tengslum við hugsanlegt öskufall í sveitarfélaginu.  Sérstaklega er fylgst með gangi mála í skólum og leikskólum sveitarfélagsins. Upplýsingar um viðbrögð þeirra vegna hugsanlegs öskufalls er að finna á www.mos.is/oskufall og á heimasíðum grunnskóla og leikskóla.

Íbúar eru hvattir til fylgjast vel með fréttum og kynna sér upplýsingar og leiðbeiningar á heimasíðu Almannavarna, www.almannavarnir.is og vef landlæknisembættisins, www.landlaeknir.is.
Til baka