Aðventutónleikar Diddúar og drengjanna í Mosfellskirkju í kvöld

Sigrún Hjálmtýsdóttir ásamt blásarasextett, í daglegu tali Diddú og drengirnir, halda sína árlegu aðventutónleika í Mosfellskirkju þriðjudaginn 7. desember 2010, kl. 20:30. Diddú og drengirnir halda einnig tónleika í Christ Church – Chelsea í London mánudaginn 13. desember næstkomandi. Á tónleikunum í London bætist Ólafur Kjartan Sigurðarson óperusöngvari í hópinn sem sérstakur gestur.  Á efnisskránni verða íslensk og erlend verk sem tengjast aðventu og jólum.

Efnisskráin er með hefðbundnum hætti, klassískir tónar og jólalög.

Aðventutónleikar Diddúar og drengjanna eru sérstakur tónlistarviðburður í menningarlífi Mosfellsbæjar, en tónleikarnir eru nú haldnir þrettánda árið í röð.  Á tónleikunum hafa frá upphafi verið frumfluttar umskriftir á klassískum verkum fyrir blásarasextett og sópran, en þetta er ekki algeng samsetning hljóðfæra og raddar.  
Margir Mosfellingar auk annarra hafa árvisst sótt litlu sveitakirkjuna í Mosfellsdal heim að þessu tilefni, enda eru tónleikarnir í Mosfellskirkju á jólaföstu orðnir ómissandi hluti af undirbúningi fyrir helgihald jóla.

Hljóðfæraleikarar eru Sigurður Ingvi Snorrason og Kjartan Óskarsson, sem leika á klarinettur, Emil Friðfinnsson og Þorkell Jóelsson sem leika á horn og á fagott leika Brjánn Ingason og Björn Árnason.

Diddú og drengirnir hafa starfað síðan 1997 og komið reglulega fram á aðventutónleikum í Mosfellskirkju og víða annars staðar. Í júlí síðastliðnum komu Diddú og drengirnir fram á þrennum tónleikum í Alsace héraði í Frakklandi og fluttu fjölbreytta dagskrá með innlendu og erlendu efni.  Á einum þessara tónleika kom 50 manna franskur kór fram með hópnum.

Miðasala á tónleikana í Mosfellskirkju verður í Bæjarskrifstofum í Mosfellsbæ í þjónustuveri á fyrstu hæð.  Þar er hægt að kaupa miða í forsölu frá 1. desember, en einnig er hægt að greiða miðana símleiðis.  Nánari upplýsingar eru veittar í s. 525 6700.