Samkomulag um meirihlutasamstarf í höfn

13/06/2014
Sjálfstæðismenn og Vinstri græn hafa undirritað samkomulag um áframhaldandi í bæjarstjórnarsamstarfi í Mosfellsbæ kjörtímabilið 2014-2018.  Í nýafstöðunum sveitarstjórnarkosningum fékk D- listinn 5 bæjarfulltrúa og hreinan meirihluta í bæjarstjórn og V- listinn 1 bæjarfulltrúa.  Samtals eru þessir flokkar því með 6 af 9 bæjarfullltrúum í bæjarstjórn Mosfellsbæjar.  Þessir tveir flokkar hafa átt í farsælu samstarfi undanfarin tvö kjörtímabil og hafa nú ákveðið að halda því samstarfi áfram. Undirritunin fór fram í Kjarna í Mosfellsbæ í dag.

Jafnframt hefur náðst samkomulag allra flokka um kjör í nefndir og ráð bæjarins og verður það samkomulag lagt fram til samþykktar á fyrsta fundi nýrrar bæjarstjórnar þann 18. Júní  nk.

Verkskipting milli D- og V- lista verður eftirfarandi:

Haraldur Sverrisson verður áfram bæjarstjóri í Mosfellsbæ.

Hafsteinn Pálsson D-lista og Bjarki Bjarnason V-lista skipta á milli sín embætti forseta bæjarstjórnar á kjörtímabilinu.

Formaður bæjarráðs verður Bryndís Haraldsdóttir D-lista.

Flokkarnir skipta svo á milli sín formennsku og varaformennsku í nefndum sveitarfélagsins á kjörtímabilinu.

Helstu áherslur flokkanna tveggja á komandi kjörtímabili eru í samræmi við stefnuskrár þeirra í nýafstöðnum sveitarstjórnarkosningum en þar má t.d. nefna:

  • Traustan og ábyrgan rekstur bæjarfélagsins og að skuldahlutfall haldi áfram að lækka og jafnframt að álögur á íbúa lækki
  • Lögð verði áhersla á uppbyggingu skólamannvirkja í samræmi við stækkandi bæjarfélag
  • Að auka fjölbreytileika og valfrelsi í skólastarfi
  • Að auka sveigjanleika í félagslega húsnæðiskerfinu og hvetja til byggingar almennra leiguíbúða í sveitarfélaginu
  • Að tryggja nægt framboð  byggingarlóða fyrir fjölbreyttar íbúðagerðir
  • Að tryggja nægt framboð atvinnulóða á sanngjörnu verði
  • Að umhverfismál verði ævinlega sett á oddinn í öllum framkvæmdum í sveitarfélaginu og aðgát verði sýnd í umgengni við náttúruna. 
  •  
  • Að upplýsingastreymi til íbúa verði aukið, meðal annars með því styrkja svonefnda íbúagátt og gera fundargögn aðgengileg á netinu.

Til baka