Gefið frí eftir hádegi til að fagna 100 ára afmæli kosningaréttar íslenskra kvenna

11/06/2015
Starfsmönnum Mosfellsbæjar verður veitt frí eftir hádegi þann 19. júní til að fagna 100 ára afmæli kosningaréttar íslenskra kvenna. Þetta er ákvörðun sem tekin hefur verið eftir hvatningarorð frá Ríkisstjórn Íslands sem hefur hvatt vinnuveitendur, jafnt á almennum vinnumarkaði sem og hjá ríki og sveitarfélögum, til að gera starfsmönnum sínum kleift að taka þátt í skipulögðum hátíðarhöldum þennan dag. Stofnanir bæjarins verða því lokaðar eftir hádegi 19. júní. Tryggt verður þó að þjónusta er varðar öryggi og grunn- og neyðarþjónustu við íbúa verði veitt.

kosningaréttur kvenna 100 ára
Mosfellsbær hefur tekið virkan þátt í að vekja athygli á 100 ára afmæli kosningaréttar íslenskra kvenna. Kona mánaðarins verður útnefnd allt árið og vakin athygli á hennar verkum og áhrifum í samfélaginu. Þær konur sem nú þegar hafa verið útnefndar eru:

Ólafía Jóhannsdóttir (1863-1924). Ólafía er þekkt sem fyrsti félagsráðgjafinn og oft nefnd móðir Theresa Íslands. Hún var í fararbroddi í kvenréttindamálum á Íslandi á sínum tíma, stofnaði félög og barðist fyrir réttindum kynsystra sinna.  

Birta Fróðadóttir (1919-1975). Birta fæddist í Danmörku en flutti til Íslands og bjó á Dalsgarði í Mosfellsdal. Hún var húsgagnasmiður og innanhúsarkitekt.  

Klara Klængsdóttir (1920-2011). Hún útskrifaðist frá Kennaraskóla Íslands árið 1939 og hóf það haust  kennslu við Brúarlandsskóla. Klara starfaði við Brúarlandsskóla og  síðar Varmárskóla allan sinn starfsaldur. Ætla má að Klara hafi kennt  fleiri Mosfellingum að lesa en nokkur annar kennari í sveitinni.

Kona aprílmánaðar er Kvenfélagskonan

Kona maímánaðar er Verkakonan

Menningardagskrá á Bókasafni Mosfellsbæjar
Menningarvor er nú í Mosfellsbæ. Menningarvor er heiti á röð þriggja menningarviðburða sem haldnir eru í apríl ár hvert. Þriðjudagskvöldið 28. apríl verður dagskrá undir yfirskriftinni Áfram stelpur! Í tilefni af 100 ára afmæli kosningaréttar kvenna 1915-2015 er verður boðið upp á fjölbreytta dagskrá í tali, tónum og leik sem tengist sögu Kvenfélags Mosfellsbæjar. Leikfélag Mosfellssveitar bregður á leik og flytur þætti úr sögu Kvenfélagsins. Kjartan Valdemarsson spilar á harmónikku, harmóníu og píanó. Dísella, Ingibjörg og Þórunn Lárusdætur syngja. Boðið verður upp á kvenfélagskaffi í lok dagskrár. 

Nánari upplýsingar um Menningarvor er hægt að nálgast á www.mos.is

Nánari upplýsingar um konu mánaðarins:
Kona mánaðarins í janúar
Kona mánaðarins í febrúar
Kona mánaðarins í mars
Kona mánaðarins í apríl
Kona mánaðarins í maí

Kona mánaðarins í júní

Til baka