GO RED - klæðumst rauðu 19. febrúar

18/02/2016
GoRed átakið miðar að því að fræða konur um áhættuþætti og einkenni hjarta- og æðasjúkdóma.

Mosfellsbær tekur virkan þátt í átakinu með því að vekja athygli á verkefninu og hvetja starfsmenn bæjarins til að klæðast rauðu föstudaginn 19. febrúar.

Hjarta- og æðasjúkdómar eru algengasta dánarorsök kvenna á Íslandi líkt og annarsstaðar í heiminum. GoRed átakið miðar að því að fræða konur um áhættuþætti og einkenni hjarta- og æðasjúkdóma og hvernig draga megi úr líkum á þessum sjúkdómum. Mosfellsbær tekur virkan þátt í átakinu með því að vekja athygli á verkefninu og hvetja starfsmenn bæjarins til að klæðast rauðu föstudaginn 19. febrúar.


Alheimsátak á vegum World Heart Federation

GoRed átakið er alheimsátak á vegum World Heart Federation og hófst á Íslandi árið 2009. Um er að ræða samstarfsverkefni Hjartaverndar, Hjartaheilla, Heilaheilla og fagdeildar hjartahjúkrunarfræðinga. Verndari átaksins hér á landi er Ingibjörg Pálmadóttir, fyrrum heilbrigðisráðherra. Formaður stjórnar GoRed er Þórdís Jóna Hrafnkelsdóttir sérfræðingur í hjartalækningum.

Aukin vitund og þekking

Konur eru oft ekki meðvitaðar um eigin áhættu og áhættuþætti. Samkvæmt rannsóknum Hjartaverndar eykst tíðni áhættuþátta hjá konum eftir 50 ára aldur, og má þar nefna hækkaðan blóðþrýsting, hátt kólesteról, sykursýki og ofþyngd. Jákvætt er að verulega hefur dregið úr reykingum á Íslandi en reykingar eru mjög stór áhættuþáttur hjarta- og æðasjúkdóma, ekki síst hjá konum. Með hollu mataræði og reglubundinni hreyfingu má hafa áhrif á flesta áhættuþætti hjarta- og æðasjúkdóma. Það eru einungis fáein ár síðan farið var að leggja áherslu á að miðla sérstaklega upplýsingum til kvenna og heilbrigðisfagfólks um hve tíðni hjarta- og æðasjúkdóma er há hjá konum. Mikilvægt er að upplýsa konur um fyrstu einkenni hjarta- og heilaæðasjúkdóma til að geta brugðist skjótt við.

Hér má sjá Facebook síðu átaksins og eru allir hvattir til að senda inn mynd af sér í rauðu á morgun, föstudaginn 19. febrúar, sem er hinn opinberi dagur GoRed átaksins.

 

Fræðslu- og skemmtidagskrá - vitundarvakning um konur og hjartasjúkdóma 21. febrúar

Iðnó þar sem hjartað slær á konudaginn 21. febrúar kl. 13.-15. Húsið opnar 12:40. 
Haukur Heiðar Ingólfsson leikur á píanó, Þórdís Jóna Hrafnkelsdóttir formaður GoRed býður fólk velkomið.

Fram koma
Björn Thoroddsen
Improv ÍslanD
Anna Þóra Björnsdóttir, uppistandari

FYRIRLESTRAR
”Hjartavænt fæði - er það til?”
Ólöf Guðný Geirsdóttir,næringarfræðingur
”Hjartað, lífstíllinn og Hamingjan”
Erla Gerður Sveinsdóttir, heimilislæknir
”Skiptir máli að hjartað slái í takt?”
Hilma Hólm, hjartalæknir

Kynnir Hulda Geirsdóttir

Aðgangur ókeypis.

Go Red

Til baka