Hátíðarhelgi í Mosfellsbæ

16/06/2017

Fram undan er viðburðarík helgi í Mosfellsbæ. Laugardaginn 17. júní fara fram mikil hátíðarhöld á þjóðhátíðardegi Íslendinga. Á sunnudaginn fer svo fram hið árlega Kvennahlaup þar sem hundruðir kvenna hittast að Varmá og hlaupa eða ganga sér til skemmtunar.

Laugardagur 17. júní

Hátíðardagskrá á sjálfan þjóðhátíðardaginn hefst í Lágafellskirkju kl. 11 þar sem árleg hátíðarguðsþjónusta fer fram og skátar standa heiðursvörð. Blakdeild Aftureldingar mun vígja nýjan strandblakvöll á útivistarsvæðinu Stekkjarflöt við Álafosskvos. Uppsetning á vellinum er fyrsta verkefnið sem lítur dagsins ljós eftir kosninguna í lýðræðisverkefninu Okkar Mosó. Stekkjarflöt - útivistar¬paradís fékk þar flest atkvæði. Bikarmeistarar karla og kvenna í blaki munu leika vígsluleikinn og í kjölfarið mun blakdeildin standa fyrir móti fyrir börn og unglinga. Skráning fer fram í gegnum netfangið blakumfa@gmail.com (2-3 í liði).

Skrúðganga verður frá Miðbæjartorginu kl. 13:45 og munu skátar úr Mosverjum leiða gönguna niður að Hlégarði. Gengið er niður Þverholt og Bogatanga í átt að hestinum á hringtorginu ofan hesthúsahverfisins. Þaðan er gengið upp skólabrautina í átt að Hlégarði. Barnadagskrá hefst við Hlégarð kl. 14. Þar verða hoppukastalar, skátaleikir, andlitsmálun og fleira fyrir krakkana. Á sviðinu munu m.a. koma fram Solla stirða, Sveppi og Villi, Aron Hannes, danshópur og söngvarar úr Mosfellsbæ. Að lokinni barnadagskrá tekur við keppnin Sterkasti maður Íslands í umsjá Hjalta Úrsus.

Afturelding verður með sitt glæsilega kaffihlaðborð í Hlégarði kl. 14:00-16:00. Mosfellingar eru hvattir til að klæða sig upp í tilefni dagsins. Þeim sem klæðast þjóðbúningi 17. Júní verður boðið frítt í kaffihlaðborðið.

Um kvöldið fer fram dansleikur í Hlégarði þar sem Sálin hans Jóns míns leikur.

Dagskrá

Kl. 11:00

  • Hátíðarguðsþjónusta í Lágafellskirkju.
  • Prestur: Sr. Ragnheiður Jónsdóttir.
  • Ræðumaður: Anna Sigríður Guðnadóttir, bæjarfulltrúi.

Kl. 13:00

  • Vígsla strandblakvallar á Stekkjarflöt.
  • Nýr strandblakvöllur vígður á útivistarsvæðinu Stekkjarflöt við Álafosskvos.
  • Bikarmeistarar kvenna og karla leika vígsluleikinn að loknu ávarpi frá formanni íþrótta- og tómstundanefndar.
  • Í framhaldi tekur við strandblakmót fyrir börn og unglinga í umsjá Blakdeildar Aftureldingar.

Kl. 13:45

  • Skrúðganga frá Miðbæjartorgi.
  • Skátafélagið Mosverjar leiðir skrúðgöngu að Hlégarði.

Kl. 14:00

  • Fjölskyldudagskrá við Hlégarð.
  • Skólahljómsveit Mosfellsbæjar tekur á móti skrúðgöngu.
  • Ávarp fjallkonu.
  • Hátíðarræða: Bryndís Haraldsdóttir bæjarfulltrúi og þingmaður.
  • Solla stirða úr Latabæ er kynnir dagsins.
  • Krakkar af leikskólanum Reykjakoti syngja nokkur lög.
  • Sveppi og Villi mæta með gítarinn og trylla þjóðhátíðargesti.
  • Aron Hannes úr Söngvakeppni Sjónvarpsins lætur sjá sig.
  • Atriði úr Skilaboðaskjóðunni sem sýnd hefur verið í Bæjarleikhúsinu.
  • Danshópur DWC stígur trylltan dans.
  • Glæsilegt kaffihlaðborð Aftureldingar í Hlégarði.
  • Hoppukastalar, skátaleikir og andlitsmálun.

Kl. 16:00

  • Sterkasti maður Íslands.
  • Keppt um titilinn Sterkasti maður Íslands á Hlégarðstúninu.
  • Hjalti Úrsus heldur utan um þessa árlegu aflraunakeppni.

 

Sunnudagur 18. júní

Á sunnudeginum fer hið árlega kvennahlaup fram. Boðið verður upp á fjórar vegalengdir: 900 m, 3 km, 5 km, 7 km og 9 km. Hlaupið hefst á íþróttavellinum að Varmá kl. 11:00 að lokinni upphitun. Mosfellska söngkonan Stefanía Svavars ríður á vaðið kl. 10:30 og þær Alfa og Halla Karen stjórna síðan formlegri upphitun.

  • Skráning er hafin í World Class í Lágafellslaug. Einnig er hægt að skrá sig á staðnum frá kl. 10.
  • Verð: 1.000 kr. fyrir 12 ára og yngri og 2.000 kr. fyrir eldri en 12 ára. 
  • Allir þátttakendur fá bol og verðlaunapening, auk þess fá langömmur rós.
  • Að loknu hlaupi er þátttakendum boðið frítt í sund að Varmá í boði Mosfellsbæjar.
  • Næg bílastæði eru við íþróttamiðstöðin að Varmá, Hlégarð og Brúarland.

 

Til baka