Tvöföldun Vesturlandsvegar í Mosfellsbæ boðin út

11/04/2020

Útboð Vegagerðarinnar á tvöföldun Vesturlandsvegar milli Skarhólabrautar og Langatanga í Mosfellsbæ var auglýst á vef Vegagerðarinnar þann 8. apríl 2020.

Verkefnið er samstarfsverkefni Vegagerðarinnar og Mosfellsbæjar og felur í sér miklar samgöngubætur fyrir bæði íbúa Mosfellsbæjar og þá sem eru á norður eða vesturleið.

Tilboð í framkvæmdina verða opnuð þann 5. maí og er gert ráð fyrir að verkinu verði lokið þann 1. desember 2020.

Áður hafði bæjarráð Mosfellsbæjar samþykkt samning milli Mosfellsbæjar og Vegagerðarinnar um kostnaðarskiptingu og endanlega kostnaðaráætlun verksins.

Verkefnið felst í að breikka vegsvæðið á kaflanum milli Skarhólabrautar og Langatanga, koma þar fyrir fjórum akreinum og aðskilja akstursstefnur með vegriði. Vegakaflinn er 1,1 km. að lengd og hefur reynst flöskuháls þegar umferð er mikil en við framkvæmdina eykst jafnframt umferðaröryggi til muna. Samhliða verða byggðir hljóðvarnarveggir, hljóðmanir, biðstöð fyrir Strætó og tilheyrandi tengingar við stígakerfi Mosfellsbæjar.

„Með breikkun Vesturlandsvegar í gegnum Mosfellsbæ verður brátt úr sögunni einn mesti flöskuhálsinn á þjóðvegi eitt. Langar raðir sem myndast hafa í átt að Mosfellsbæ á álagstímum heyra þá sögunni til. Þessi framkvæmd hefur verið baráttumál okkar Mosfellinga í mörg ár og því er er einkar ánægjulegt að af henni verði nú.“ segir Haraldur Sverrisson, bæjarstjóri Mosfellsbæjar.

Til baka