Stóri plokkdagurinn í Mosfellsbæ á Degi umhverfisins

24/04/2020

Mosfellsbær tekur þátt í Stóra plokkdeginum, laugardaginn 25. apríl, á Degi umhverfisins. Með þátttökunni vill Mosfellsbær taka virkan þátt í þessu flotta umhverfisátaki sem fer fram undir merkjum félagsskaparins Plokk á Íslandi. Á þeim degi eru íbúar hvattir til að plokka rusl í sínum hverfum og á opnum svæðum.

Í ár vilja plokkarar landsins beina athygli sinni sérstaklega að heilbrigðisstofnunum, eins og heilsugæslunni og dvalar- og hjúkrunarheimilum, og með því sýna þeim táknrænan stuðning fyrir góð störf á erfiðum tímum.

Íbúar munu geta nálgast ruslapoka fyrir plokkið á Upplýsingatorgi Mosfellsbæjar í Kjarna, Þverholti 2, fyrir framan bókasafnið, á milli kl. 9:00-18:00.

Plokkarar geta síðan losað sig við fulla poka í ruslagáma við verslun Krónunar við Bjarkarholt, í boði verslunarinn og Terru umhverfisþjónustu.

Ennfremur er á grenndargámastöðvum við Dælustöðvarveg, Langatanga, Bogatanga og Skeiðholt að finna gáma fyrir flokkað rusl, plast og gler, auk þess sem endurvinnslustöð Sorpu við Blíðubakka er opin alla helgina og tekur á móti fjölmörgum endurvinnsluflokkum.

Starfsmenn Þjónustustöðvar Mosfellsbæjar munu síðan á mánudagsmorgun sækja þá poka sem plokkarar setja utan við lóðarmörk. Plokkarar eru beðnir um að láta starfsmenn Þjónustustöðvar vita hvar sækja þarf slíka poka með því að senda tölvupóst á mos[hja]mos.is eða hringja í Þjónustuver Mosfellsbæjar í síma 525-6700.

 

 

 

Til baka