Fréttir eftir mánuðum

Nokkur laus pláss á rafgítar og rafbassa við Listaskóla Mosfellsbæjar Tónlistardeild. Umsóknir fyrir næsta vetur (2013-2014) þurfa að berast við fyrsta tækifæri. Sótt er um á íbúagáttinni á mos.is . Uppýsingar um skólann á listmos.is

Þriðjudaginn 30. apríl kl. 20:00 var opið hús hjá Skólaskrifstofu Mosfellsbæjar. Í nýjum aðalnámskrám leik- og grunnskóla er horft til 6 grunnþátta sem eru læsi, sjálfbærni, heilbrigði og velferð, lýðræði og mannréttindi, jafnrétti og sköpun. Á síðasta opna húsi þessa vetrar höfum við fengið Ásu Björk Snorradóttur myndlistarkennara til að fjalla um Sköpun og sköpunargleði í námi og starfi í leik- og grunnskóla.

Fyrr í þessum mánuði eignaðist Afturelding Íslandsmeistara í 6. flokki yngra ár í handbolta, bæði í kvenna og karlaflokki. Greinilegt að hér er á ferð flottir handboltakrakkar og verður spennandi að fylgjast með þessum öfluga árgangi  í framtíðinni. Mosfellsbær óskar þeim og þjálfurum þeirra innilega til hamingju.

Bæjarstjórn Mosfellsbæjar samþykkti á hátíðarfundi þann 9.ágúst síðastliðinn að leggja til friðlýsingu fossa í tilefni af 25 ára kaupstaðarafmæli Mosfellsbæjar. Þeir fossar sem lagt var til að friðlýsa voru Álafoss, Tungufoss og Helgufoss. Í gær á  Degi umhverfisins,  skrifuðu Svandís Svavarsdóttir umhverfisráðherra, Kristín Linda Árnadóttir forstjóri Umhverfisstofnunar og Haraldur Sverrisson bæjarstjóri í Mosfellsbæ undir friðlýsingu Álafoss og Tungufoss.

Stofnfundur samtaka ferðaþjónustuaðila í Mosfellsbæ verður haldinn mánudaginn 29. apríl kl. 17. Kæru félagar í ferðaþjónustu í Mosfellsbæ. Eins og fram kom á síðasta fundi var almennur áhugi fyrir því að stofnuð yrðu samtök ferðaþjónustuaðila í bænum. Stofnfundur verður haldinn mánudaginn 29. apríl kl. 17:00 á 1. hæð í Kjarna og eru allir velkomnir. Vonumst til að sjá sem flesta.

Fjölbreytt afþreying verður í boði fyrir börn og ungmenni í Mosfellsbæ í sumar. Að vanda verða haldinn fjölbreytt og skemmtileg námskeið og ættu allir að finna eitthvað við sitt hæfi. Hægt er að kynna sér úrvalið hér.

Skrifað verður undir friðlýsingu Álafoss og Tungufoss við hátíðlega athöfn í Álafosskvos á Degi umhverfisins þann 25. apríl. Þar munu Haraldur Sverrisson bæjarstjóri Mosfellsbæjar, Svandís Svavarsdóttir umhverfisráðherra og Kristín Linda Árnadóttir forstjóri Umhverfisstofnunar undirrita friðlýsingu fossanna og nærumhverfis sem
er samtals 2,8 hektarar að stærð.

Þrátt fyrir slyddu og snjó verður haldið upp á komu sumars með skrúðgöngu og skemmtun á lóð Lágafellskóla í dag. Skólahljómsveitin spilar og skátarnir setja upp leiktæki. Íbúar í Mosfellsbæ eru öllu vanir í þessum efnum og klæða sig og sína eftir aðstæðum og fjölmenna eflaust að vanda.

Vortónleikar Skólahljómsveitar Mosfellsbæjar verða í Langholtskirkju 23. apríl.  Þar koma fram hljóðfæraleikarar á aldrinum 9 – 19 ára. Efnisskráin er mjög fjölbreytt og skemmtileg.  Elsti hópur hljómsveitarinnar er á leiðinni til Danmerkur daga 7. – 14. júní n.k. Hópurinn mun einnig leika við hátíðarhöld Sumardagsins fyrsta í Lágafellsskóla kl. 13.30 og verða með „Flóamarkað“ til fjáröflunar ferðinni.

Í haust var ákveðið að efna til  þróunarverkefnis í 4. bekkjum grunnskóla Mosfellsbæjar en sams konar verkefni hófst í Hafnarfirði haustið 2010 og hlaut nafnið Litla upplestrarkeppnin. Hugmyndin vaknaði þegar Stóra upplestrarkeppnin varð 15 ára og þótti tímabært að færa út kvíarnar og byggja á markmiðum Stóru upplestrarkeppninnar en þau eru að flytja móðurmálið sjálfum sér og öðrum til ánægju og hafa vandvirkni og virðingu að leiðarljósi.

Laugardaginn 20. apríl opnaði List án landamæra samsýningu Helga Þorgils Friðjónssonar og Snorra Ásgeirssonar í Listasal Mosfellsbæjar. Sýningin ber heitið ,,Lóðréttar öldur" og er samsett af veggverkum og skúlptúrum.

Á afmælisdag Halldórs Laxness þann 23.apríl verður menningardagskrá á bókasafni Mosfellsbæjar. Dagskráin er liður í Menningarvori sem er haldið nú í fjórða sinn. Nú þegar hafa verið haldin tékkneskt og franskt kvöld sem voru mjög vel sótt.  Þykir við hæfi að enda á íslensku kvöldi til heiðurs íslandssögunum og Halldóri Laxness.

Bæjarfulltrúarnir, Bryndís Haraldsdóttir og Jón Jósef Bjarnason, verða með viðtalstíma miðvikudaginn 24. apríl nk.  Bæjarfulltrúarnir verða til viðtals kl. 17:00 - 18:00  á 2. hæð á bæjarskrifstofu Mosfellsbæjar, Kjarna, Þverholti 2. Eftir sem áður er hægt að panta viðtal við bæjarstjóra hvenær sem er með því að hringja í síma 525 6700. 

Mosfellsbær óskar eftir tilboðum í 5 lausar kennslustofur. Um er að ræða þrjár stofur, samtengdar með millibyggingum, og tvær stakstæðar stofur. Alls eru stofurnar um 490 m². Heimilt er að bjóða tilbúnar stofur og / eða nýsmíði.
Stofurnar skulu vera fullbúnar eigi síðar en 8. ágúst 2013.

Kjörskrá í Mosfellsbæ vegna alþingiskosninga 27. apríl 2013. Í samræmi við 26. gr. laga nr. 24/2000 um kosningar til Alþingis liggur kjörskrá, vegna alþingiskosninga þann 27. apríl 2013, frammi almenningi til sýnis í þjónustuveri Mosfellsbæjar að Þverholti 2, á skrifstofutíma frá kl. 08:00 – 16:00, frá og með 15. apríl 2013 og til kjördags.

Auglýsing um kjörstað og aðsetur yfirkjörstjórnar Mosfellsbæjar. Kjörstaður vegna alþingiskosninganna sem fram fara þann 27. apríl 2013 er í Lágafellsskóla við Lækjarhlíð og stendur kjörfundur frá kl. 09-22. Aðsetur yfirkjörstjórnar á kjördag þann 27. apríl 2013 verður á sama stað.

Bæjarstjórn Mosfellsbæjar staðfesti í gær reglur íþrótta- og tómstundanefndar um frekari stuðning við það afreksíþróttafólk sem á lögheimili í Mosfellsbæ og hlotið hefur styrk úr afrekssjóði Íþrótta- og Ólympíusambands Íslands eða úr styrktarsjóðs ungra og framúrskarandi efnilegra íþróttamanna. Styrkurinn tekur ekki til flokkaíþrótta.

Auglýstar eru þrjár tillögur sem allar tengjast áformum um að bæta við færanlegum kennslustofum í nágrenni við Lágafellsskóla. Athugasemdafrestur er t.o.m. 31. maí.

Dagana 19. apríl – 3. maí verður hreinsunarátak í Mosfellsbæ. Á því tímabili eru íbúar Mosfellsbæjar hvattir til að hreinsa í kringum hús sín og næsta umhverfi. Nú hillir í  vorið og því tímabært að fjarlægja rusl eftir veturinn.

Haldinn verður opinn kynningarfundur* um breytingar á svæðisskipulagi höfuðborgarsvæðisins 2001-2024, kl 16:30,  þann 18. apríl í Salnum Kópavogi.  Kynntar verða tillögur að breytingum sem tilkomnar eru vegna yfirstandandi endurskoðunar aðildarsveitarfélaga á aðalskipulagi. Kynning þessi fer fram áður en breytingartillögur eru teknar til afgreiðslu hjá svæðisskipulagsnefnd og sveitarstjórnum.

Stórsöngkonan Sigríður Thorlacius kemur í Mosfellsbæ í kvöld, þriðjudaginn 16. apríl,  og tekur ásamt gítarleikaranum Guðmundi Óskari Guðmundssyni, nokkur frönsk sönglög hinna ýmsu höfunda frá hinum ýmsu tímum . Lög eftir til að mynda Jacques Brel, Joseph Kosma og Serge Gainsbourg. Lög sem þekktust eru í flutningi Edith Piaf, Josephine Baker og Blossom Dearie meðal annarra.

Hin árlega menningarvika leikskóla Mosfellsbæjar verður dagana 16-18 apríl n.k. í Kjarna. Öll börn í leikskólum Mosfellsbæjar hafa verið að vinna listaverk sem verða til sýnis á torginu í Kjarnanum. Sýningin gefur innsýn í það frábæra, fjölbreytta og metnaðarfulla starf sem unnið er í leikskólum....

Umhverfisstofnun og bæjarstjórn Mosfellsbæjar auglýsa hér með til kynningar tillögur að friðlýsingu tveggja fossa innan marka Mosfellsbæjar, Álafoss og Tungufoss sem og nánasta nágrennis þeirra. Tillögurnar eru að frumkvæði bæjarstjórnar Mosfellsbæjar sem lagði málið til á hátíðarbæjarstjórnarfundi í ágúst síðastliðnum af tilefni 25 ára afmælis bæjarins.

UM TILLÖGUR AÐ DEILISKIPULAGI VEGNA FÆRANLEGRA KENNSLUSTOFA verður haldinn í Lágafellsskóla mánudaginn 15. apríl kl. 20. Kynntar verða hugmyndir um úrbætur í húsnæðismálum skólans á komandi hausti og tillögur að deiliskipulagi og breytingum á deiliskipulagi í tengslum við þær. M.a. verður kynnt tillaga um nýja lóð undir færanlegar kennslustofur fyrir leikskóla sunnan Þrastarhöfða.

Nú liggur fyrir fyrirkomulag á akstri ofan úr Mosfellsdal í samræmi við óskir aðalfundar Víghóls, íbúasamtaka í Mosfellsdal. Ákveðið hefur verið að morgunakstur verði á virkum dögum ofan úr Dal.  Um er að ræða tilraunaverkefni sem stendur fram til 5. júní. Aksturinn hefst á mánudaginn 15. apríl.

Kynning á verkefnislýsingu deiliskipulags skv. 40. gr. skipulagslaga. Um er að ræða áform um að setja allt að 8 færanlegar kennslustofur á lóð næst Baugshlíð sunnan Þrastarhöfða. Ábendingar varðandi verkefnislýsinguna berist fyrir 19. apríl.

Tekið verður á móti skráningum í Vinnuskólann frá 12.04. til 24.04. 2013. Vinnuskóli Mosfellsbæjar er starfræktur fyrir nemendur í 8., 9. og 10. bekk í grunnskólum Mosfellsbæjar. Skráning nemenda í vinnuskólann stendur hún til 24.04. Skráningin fer fram í gegn um íbúagátt Mosfellsbæjar . Þeir sem sækja um fyrir 24.apríl geta treyst því að fá vinnu í sumar, en ekki er víst að hægt sé að verða við öllum beiðnum um vinnutímabil.

Ársreikningur Mosfellsbæjar fyrir árið 2012 var lagður fram í bæjarráði í dag og honum vísað til fyrri umræðu í bæjarstjórn. Rekstur Mosfellsbæjar gekk vel á árinu 2012 og var rekstrarafgangur fyrir fjármagnsliði um 612 milljónir sem er um 10% af tekjum. Niðurstaðan er í samræmi við fjárhagsáætlun. Að teknu tilliti til fjármagnsliða var afgangur af rekstri bæjarins um 29 milljónir eða 0,4% af tekjum.

Ákveðið hefur verið að framlengja frest til 28. apríl til að taka þátt í kosningu á nafnaval hjúkrunarheimilinu EIR en senn líður að því að hjúkrunarheimilið við Langatanga verði tekið í notkun og hefur íbúum Mosfellsbæjar gefist kostur á að taka þátt í nafnavalinu. Leitað hefur verið í smiðju hugmyndaríkra Mosfellinga og út úr því komu fjöldi nafna sem hafa tilvísun ýmist í starfsemi hússins, staðhætti, fornsögurnar eða bókmenntir. 

Auglýst er til umsóknar fyrir  ungmenni í 9. bekk í grunnskólum Mosfellsbæjar að taka þátt í unglingaverkefni norrænna vinabæja Mosfellsbæjar. Vinabæirnir eru Thisted, Uddevalla, Mosfellsbær, Loimaa og Skien. Staðsetning  unglingaverkefnisins í ár er  í Thisted, vinabæ okkar í Danmörku  dagana 15. til 19. júní 2013

Þriðjudaginn 9. apríl sl. hófst Menningarvor Mosfellsbæjar 2013 í Bókasafninu. Þetta er í fjórða skipti sem Menningarvorið er haldið. Mikill fjöldi gesta sótti viðburðinn, eða um 250 manns. Dagskráin var tileinkuð tékkneskri tónlist og bókmenntum. Arnhildur Valgarðsdóttir og Hjörleifur Valsson léku tékkneska tónlist á flygil og fiðlu og gerðu það meistaralega ! Var þeim ákaft fagnað. Hjörleifur sagði sögur frá námsárum sínum í Prag og Erlingur Gíslason leikari las snilldarlega úr bókinni um Góða dátann Svejk, við mikinn fögnuð áheyrenda.

Vegna bilunar verður kaldavatnslaust í Akurholti frá kl. 10:00 í dag og frameftir degi.

Vatnsveita Mosfellsbæjar

Eins og undanfarin ár verður starfræktur gæsluvöllur í sumar. Á gæsluleikvellinum gefst börnum tækifæri á að leika sér í öruggu og skemmtilegu umhverfi undir eftirliti starfsfólks. Hafa ber í huga að börnin eru úti allan tímann og er því allt öðruvísi en leikskóli þar sem hægt er að leika sér inni. Aðkoma á gæsluleikvöllinn er frá Kjarna (neðra plan)

Stærðfræðikeppni Borgarholtsskóla fór fram í byrjun mars sl. Skólum í Grafarvogi, Grafarholti, Árbæ, Mosfellsbæ og Kjalarnesi var boðin þáttaka. Alls tóku 145 nemendur þátt í keppninni að þessu sinni og átti Varmárskóli 29 þátttakendur. Níu af  nemendum skólans höfnuðu í 1. - 10. sæti,  en það voru:

Utankjörfundaratkvæðagreiðsla vegna alþingiskosninga sem fram fara 27. apríl 2013, hófust hjá embætti sýslumannsins í Reykjavík 2. mars. Umdæmi sýslumannsins í Reykjavík nær yfir Reykjavíkurborg, Seltjarnarnesbæ, Mosfellsbæ og Kjósarhrepp. Atkvæðagreiðslan fer í fyrstu fram á skrifstofu embættisins að Skógarhlíð 6, Reykjavík, alla virka daga milli kl. 8:30 – 15:00. Um helgar er opið frá kl. 12:00 – 14:00.