Fréttir eftir mánuðum

Skólahljómsveit Mosfellsbæjar spilar í Kjarna frá kl. 15:30. Dagskrá á Miðbæjartorginu hefst kl. 16:00. Skólakór Varmárskóla syngur jólalög, og söngkonan Hreindís Ylva Garðarsdóttir Holm kemur fram. Gera má ráð fyrir að einhverjir jólasveinanna komi ofan úr Esju þennan dag til að dansa í kringum tréð með börnunum.

Fjárhagsáætlun Mosfellsbæjar fyrir árið 2020 sem samþykkt var á bæjarstjórnarfundi þann 27. nóvember gerir ráð fyrir að tekjur verði 13.380 m.kr., gjöld án fjármagnsliða 12.412 m.kr., fjármagnsliðir 628 m.kr. og að rekstrarafgangur verði 340 m.kr.

Mosfellsbær auglýsir hér með til kynningar deiliskipulagslýsingu, skv. 40 gr. skipulagslaga nr. 123/2010: Fyrir gerð deiliskipulags sem afmarkast af Langatanga í austri, Bogatanga í norðri og verslunar- og þjónustusvæði við Vesturlandsveg í suðri. Stærð skipulagssvæðisins er tæpir 2,6 ha og er í aðalskipulagi Mosfellsbæjar skilgreint sem íbúðarhúsasvæði, 120-íb.

Til úthlutunar eru fjórar einbýlishúsalóðir við Súluhöfða 36, 43, 45 og 47 og þrjár atvinnuhúsalóðir við Desjamýri.

Bókmenntahlaðborð Bókasafns Mosfellsbæjar, sem fór fram 21. nóvember sl., var að vanda vel sótt. Hátt í 300 gestir mættu til að hlýða á rithöfunda lesa úr nýútkomnum bókum sínum.

Mosfellsbær vinnur að byggingu leik- og grunnskólans Helgafellsskóla og hefur það verið gert í nokkrum áföngum. Byggingu 1. áfanga skólans er lokið, búið er að innrétta leikskóla sem telst til 4. áfanga og unnið er að hluta lóðar og á þeirri vinnu að ljúka á næstu mánuðum.

Vegna vinnu við stofnæð undir Vesturlandsvegi verður lokað fyrir heitt vatn miðvikudaginn 20. nóvember frá kl. 9:00 til 12:00. Lokunin nær til Skálahlíðar að hluta og Lágafells. Einnig gæti þrýstingur lækkað í Túnum og Mýrum.

Nýtt fjölnota íþróttahús var vígt að Varmá laugardaginn 9. nóvember við hátíðlega athöfn. Húsið er sérútbúið fyrir knattspyrnu en einnig eru þar þrjár hlaupabrautir ásamt göngubraut umhverfis völlinn. Húsið er um 4000m² að stærð og kærkomin viðbót við þá aðstöðu sem fyrir er.

Rafmagnslaust í hluta Mosfeslldals kl. 13:00-16:00 og við Völuteig kl. 18:00-21:00 fimmtudaginn 14. nóvember.

Vegna tenginga á stofnæð þá verður minnkandi vatnsþrýstingur hjá megninu af Mosfellsbæ næstu 3-4 klst. Við biðjumst velvirðingar á þeim óþægindum sem þetta kann að valda. Unnið er að lagfæringu.

Í tengslum við uppbyggingu nýrra húsa við Bjarkarholt stendur yfir vinna við allar aðveitulagnir norðan götunnar. Áhersla er lögð á að röskun á starfsemi við götuna verði sem minnst á framkvæmdatímanum enda um að ræða bæði leið strætisvagna og verslunargötu.

Menningar- og nýsköpunarnefnd auglýsir eftir umsóknum um þróunar- og nýsköpunarviðurkenningu Mosfellsbæjar 2019. Hér er um að ræða tækifæri fyrir frumkvöðla sem hafa hugmyndir um nýsköpun til að koma verkefni sínu á framfæri.

Samtök sveitarfélaga á höfuðborgarsvæðinu (SSH) hlutu viðurkenningu fyrir tvö Erasmus+ verkefni: „Stuðningur til að efla læsi og aðlögun fjöl-/tvítyngdra í grunnskólum“ og „Starfsspeglun í kennslu og aðlögun fjöl-/tvítyngdra í grunnskólum“.

Nýtt fjölnota knattspyrnuhús verður vígt að Varmá laugardaginn 9. nóvember kl. 13:00-15:00. Í tilefni þess verður efnt til nafnasamkeppni og eru allir hvattir til að taka þátt og senda inn tillögu að nafni á húsið.

Vegna starfsdags bæjarskrifstofa Mosfellsbæjar fimmtudaginn 7. nóvember verður lokað frá kl. 13:00-16:00. Þjónustuverið svarar áríðandi erindum í síma 525-6700 og verður leitast við að sinna öllu slíku eins vel og frekast er unnt.

Þriðjudaginn 5. nóvember, kl. 13:00-15:00, verður rafmagnslaust í Vogatungu 1 - 19.

Umsóknarfresti vegna úthlutunar 15 lóða við Súluhöfða lauk á miðnætti 31.10.2019. Alls bárust umsóknir frá 26 umsækjendum. Lögmaður Mosfellsbæjar, skjalastjóri og persónuverndarfulltrúi munu opna umsóknir frá kl. 10:00 mánudaginn 4.11.2019 í Helgafelli, fundarsal bæjarstjórnar Mosfellsbæjar, Þverholti 2.

Í framhaldi af kynningarfundi 28. október á tillögu að deiliskipulagsbreytingu 4. áfanga Helgafellshverfis, er hægt að nálgast rammaskipulag Helgafellshverfis frá 2005 á vef Mosfellsbæjar.