Í túninu heima

Bæjarhátíð Mosfellsbæjar, Í túninu heima, er haldin síðustu helgina í ágúst ár hvert. Hátíðin er sannkölluð fjölskylduhátíð sem stendur í þrjá daga og geta allir fundið eitthvað við sitt hæfi.

• Í túninu heima á Facebook. 

Fjölbreyttir menningarviðburðir eru í boði, tónleikar, myndlistasýningar, útimarkaðir og íþróttaviðburðir svo fátt eitt sé nefnt. 

Hátíðin hefst formlega á föstudagskvöldi með skrúðgöngu, varðeld og brekkusöng í Álafosskvos.

Hápunktur hátíðarinnar er á laugardagskvöld þegar stórtónleikar fara fram á Miðbæjartorgi og stíga ávallt landsþekktar hljómsveitir ásamt heimamönnum á svið.

Litadýrð í Mosfellsbæ

Bærinn er klæddur í hátíðarbúning með skreytingum þar sem hvert hverfi hefur sinn lit.

• Gulur: Hlíðar, Höfðar, Tún og Mýrar.
• Rauður: Tangar, Holt og miðbær.
• Bleikur: Teigar, Krikar, Lönd, Ásar, Tungur og Mosfellsdalur.
• Blár: Reykjahverfi og Helgafellsland.

Vilt þú taka þátt?

Íbúar, félagasamtök og fyrirtæki í Mosfellsbæ eru hvattir til að taka virkan þátt í hátíðinni. 

Ef einhverjir luma á hugmyndum eða vilja vera með viðburð Í túninu heima hjá sér, þá má senda tölvupóst á ituninuheima[hja]mos.is.

Sölubásar í Álafosskvosinni

Eins og áður verða sölubásar staðsettir  í Álafosskvosinni. Til að fá upplýsingar um markaðinn í Álafosskvos bendum við á Facebook síðu markaðarins.

Mosfellsbæjarpeysan

Saga ullariðnaðar á Íslandi hefur verið samofin sögu Mosfellsbæjar í gegnum tíðina. Í tilefni bæjarhátíðarinnar hefur Mosfellsbær látið hanna „Mosfellsbæjarpeysu“ og má finna uppskriftir að peysunni hér að neðan. Peysan ber merki Mosfellsbæjar og hægt er að velja mynstur eftir mismunandi hverfislit.

Prjónauppskriftir

• Bláa hverfið (pdf).
• Bleika hverfið (pdf).
• Gula hverfið (pdf).
• Rauða hverfið (pdf).