Hlégarður

Hlégarður er félagsheimili og menningarhús sem staðsett er í hjarta Mosfellsbæjar.

Í Hlégarði hafa farið fram viðburðir af ýmsu tagi eins og tónleikar, leiksýningar, fundir, ráðstefnur, árshátíðir og einkasamkvæmi en staðurinn tekur um 250 manns í sitjandi veislur eða 350-400 í standandi samkvæmum.

Mosfellsbær á húsið nú og leigir út reksturinn.

Hlégarður er staðsettur að Háholti 2, 270 Mosfellsbæ.

Veisluhöld, viðburðir og ráðstefnur

Núverandi rekstraraðilar (Hlégarður ehf.) hafa mikla reynslu af rekstri veislusala, veisluþjónustu og viðburðahaldi. Í húsinu er veislueldhús á heimsmælikvarða auk glæsilegs hljóð-, ljós- og myndbúnaðar.

Allar nánari upplýsingar um starfsemina er hægt að nálgast hjá Valdimar, s: 868-1298, eða Ísólfi, s: 896-9908, eða með því að senda tölvupóst á hlegardur[hja]hlegardur.is.

 

Markmið Mosfellsbæjar með rekstri Hlégarðs

  • Efla lista- og menningarlíf í Mosfellsbæ.
  • Bjóða upp á fjölbreytta menningarviðburði með reglubundnum hætti.
  • Auðvelda ungum listamönnum að sinna list sinni og koma henni á framfæri.
  • Að Hlégarður verði félagsheimili og menningarhús bæjarbúa og að bæði ungum og öldnum gefist tækifæri til að sækja þá þjónustu sem þar er í boði.
  • Bjóða upp á aðstöðu og þjónustu fyrir fundi, móttökur, veislur og aðra mannfagnaði.
  • Gæta að ástandi húsnæðisins, innréttinga og innanstokksmuna og að virðing sé borin fyrir sögu Hlégarðs.

 

Saga Hlégarðs

Á vorfundi Mosfellshrepps árið 1947 var tekin ákvörðun um að byggingu Hlégarðs því húsnæðið sem áður var notað undir samkomur Mosfellinga þótti orðið allt of lítið og því var mikil þörf fyrir að reisa nýtt félagsheimili. Strax var ákveðið að leitað yrði eftir samvinnu við Kvenfélag Lágafellssóknar og Ungmennafélagið Aftureldingu. 

Húsið er mjög haglega teiknað og hefur góða aðkomu en arkitekt þess var Gísli Halldórsson. Hið nýja félagsheimili Mosfellinga var vígt við hátíðlega athöfn þann 17. mars 1951.

Laxness ánægður með nafn hússins

Nóbelskáldið og Mosfellingurinn Halldór Laxness hampaði nafni Hlégarðs í vígsluræðu sinni um húsið. Þar sagði hann meðal annars:

"Mér þykir viðkunnalegt nafnið sem þetta félagshús hefur hlotið, það mætti verða sannnefni á tvennan hátt, í fyrsta lagi vegna þess að húsið er eftir smekk nútímans reist niður í dæld eða lág, í hléi fyrir mesta vindinum, eða að minsta kosti í meira hléi en ef það hefði verið sett uppá hól eins og fornmenn voru vanir að setja hús sín;og í öðru lagi á slíkt hús sem þetta að vera sveitúngum skjól og afdrep sem þeir leiti til úr stormviðrum hversdagslífsins og finni skemmtun og mentun: Hlégarður."

Ógleymanlegir viðburðir og sveitaböll

Félagslífið í Mosfellsveit blómstaði með tilkomu nýs félagsheimilis og hafa margar skemmtanir verið haldnar í Hlégarði og staðurinn var lengi vel þekktur fyrir sveitaböll sem þar voru haldin. Leikfélag Mosfellsveitar sýndi áður fyrr leikrit í húsinu og margir menningarviðburðir hafa verið haldnir þar í gegnum tíðina. Á sjötta áratugnum var Hlégarður eitt stærsta samkomuhús á Stór-Reykjarvíkursvæðinu og var því oft þétt bókað. Húsið var stækkað með viðbyggingu á níunda áratugnum.

Hlégarður hefur ævinlega endurspeglað mannlífið í bænum.