Mosfellingur ársins

Bæjarblaðið Mosfellingur hefur staðið fyrir vali á Mosfellingi ársins síðan 2005. Blaðið kynnir Mosfelling ársins í fyrsta tölublaði hvers árs.

2019 - Hilmar Elísson


Mosfellingur ársins 2019 er Hilmar Elísson. 

Hilmar sem er húsasmíðameistari og rekur fyrirtækið H-verk er meðlimur í karlaþrekinu í World Class og fastagestur í Lágafellslaug. 

Þann 28. janúar 2019 ákvað Hilmar að fá sér sund­sprett eftir æfingu. Það má segja að hann hafi verið réttur maður á réttum stað því hann bjargaði sundlaugargesti frá drukknun sem hafði verið við köfun í lauginni.

„Þegar ég var að synda eftir æfinguna sá ég mann liggja á botninum, þetta var í dýpri enda laugarinnar og ég sá strax að þarna var ekki allt með felldu. Ég kafaði eftir manninum, það tókst ekki í fyrstu tilraun en í annari tilraun náði ég til hans. Ég náði svo að kalla á hjálp við að koma manninum upp á bakkann,“ segir Hilmar.

„Það var heppilegt að á staðnum var maður sem starfað hefur sem slökkviliðsmaður í fjöldamörg ár og kunni vel til verka í svona aðstæðum. Okkur tókst að koma manninum upp á bakkann og þá hófust strax lífgunartilraunir.“

„Það var strax farið að hnoða hann en það leið allavega mínúta þar til hann fór að sýna smá lífsmark. Sjúkraflutningamennirnir voru fljótir á staðinn enda gott að vita af þeim í nágrenninu.

Það er mjög skrítið að lenda í svona aðstæðum, maður framkvæmir bara ósjálfrátt eftir bestu getu en fær svo svolítið sjokk á eftir þegar maður áttar sig á hvað hefur gerst. Þetta er ekki skemmtileg upplifun en það var gott að allt fór vel en allir aðilar sem komu að þessu, starfsmenn og aðrir, stóðu sig með prýði. Ég var bara einn hlekkur í keðju sem vann gott verk,“ segir Hilmar að lokum og þakkar þann heiður sem honum er sýndur með nafnbótinni Mosfellingur ársins.

Texti og mynd frá mosfellingur.is.

Fulltrúar fyrri ára

Mosfellingur ársins 2018 er Óskar Vídalín en hann hefur ásamt öflugum hópi stofnað Minningarsjóð Einars Darra og hrint að stað þjóðarátakinu Ég á bara eitt líf.

Óskar missti 18 ára gamlan son sinn Einar Darra í maí sl. eftir neyslu lyfseðilsskyldara lyfja. 

„Ég er ótrúlega þakklátur og tek á móti þessari viðurkenningu fyrir hönd okkar allra sem standa að Minningarsjóðnum. Við höfum fengið mikla hjálp og frábærar móttökur alls staðar, Mosfellingar hafa sýnt okkur mikinn stuðning og styrk og fyrir það erum við gríðarlega þakklát,“ segir Óskar.

Það eru foreldrar og systur Einars Darra, þau Óskar Vídalín, Bára Tómasdóttir, Andrea Ýr og Aníta Rún sem eru forsvarsmenn Minningarsjóðsins.

„Við ákváðum fljótlega eftir fráfall Einars Darra þegar við áttuðum okkur á hve neysla lyfseðilskyldra lyfja væri stórt vandamál meðal ungmenna að stofna minningarsjóð í hans nafni. Við vildum nálgast þetta verkefni í kærleika því það er alveg í anda Einars Darra. Markmiðið er að opna umræðuna og vekja athygli á vandamálinu því við uppgötvuðum hvað við vissum lítið og hvað þetta kom okkur mikið á óvart.“

„Við byrjuðum á að vekja athygli á málstaðnum með bleikum armböndum, hettupeysum, húfum og fleiru. Við vorum áberandi á útihátíðum og öðrum viðburðum í sumar. Við völdum bleika litinn af því að það var uppáhalds liturinn hans Einars Darra. Við stofnuðum sjóðinn fyrst og fremst til að fara af stað með forvarnafræðslu. Við höfum fengið gríðarlega mikla aðstoð og góða styrki og hefjum fræðslu í grunnskólum í febrúar. Hún er gjaldfrjáls og verður beint að börnum, foreldrum og kennurum,“ segir Óskar. Þau sem standa að Minningarsjóðnum eru greinilega bara rétt að byrja en fyrirhugað er að halda þjóðfund unga fólksins í apríl. „Við erum að skipuleggja ásamt góðu fólki fund þar sem hugsunin er að fá ungt fólk alls staðar að af landinu til að taka þátt í umræðum og lausnum á þeim vandamálum sem það stendur frammi fyrir eins og kvíða, vanlíðan og fleira.“

„Við ákváðum að halda aðfangadag á óhefðbundinn hátt. Við byrjuðum á að fara á Vog og á fíknigeðdeild Landspítalans með um 100 jólagjafir. Við borðuðum saman á heimili Báru og fjölskyldu á Akranesi og opnuðum pakkana snemma. Svo vorum við öll saman klukkan 18:00 í kirkjugarðinum við leiði Einars Darra. Við höfum fengið sterk viðbrögð við þessari leið sem við völdum til að vinna úr sorginni. Við gáfum meðal annars út myndband þar sem birtar eru myndir af látnum einstaklingum og vekja athygli á því að bak við hvern einstakling situr eftir stór hópur, fjölskylda og vinir. Viðbrögðin við því hafa verið mjög sterk og við vonum að þetta skili sér og hjálpi öðrum. Þegar maður verður fyrir svona áfalli þarf maður að taka ákvörðun og ég segi fyrir mig að starfið í kringum Minningarsjóðinn hjálpar mér að takast á við sorgina,“ segir Óskar að lokum.

Texti og mynd frá mosfellingur.is.
Mynd: Raggi Óla.

Rithöfundurinn Jón Kalman Stefánsson er Mosfellingur ársins 2017.

Eftirfarandi texti er tekinn úr viðtali við Jón Kalman á mosfellingur.is:

Jón Kalman er einn af fremstu rithöfundum þjóðarinnar og hefur margsinnis verið tilnefndur til Bókmenntaverðlauna Norðurlandaráðs auk þess að hljóta Íslensku bókmenntaverðlaunin.

„Maður er bara glaður að fólki finnst ástæða til þess að velja mig,“ segir Jón um útnefningu Mosfellings. „Þá kannski hefur maður gert eitthvað gott.“

Fyrsta bók Jóns kom út árið 1988 og á hann því 30 ára rithöfundaafmæli á árinu. Hann hefur gefið út 3 ljóðabækur og 12 skáldsögur.

Jón Kalman býr með eiginkonu sinni, börnum og hundi í Svöluhöfða og hefur fjölskyldan búið í Mosfellsbæ í rúm 20 ár.

 

Kringlukastarinn og Ólympíufarinn Guðni Valur Guðnason hefur verið útnefndur Mosfellingur ársins 2016.

Eftirfarandi texti er tekinn úr viðtali við Guðna Val á mosfellingur.is:

Guðni Valur hefur tekið gríðarlegum framförum í greininni þau þrjú ár sem hann hefur stundað kringlukast af fullum krafti. Áður hafði Guðni æft aðrar greinar í frjálsum, golf, körfubolta og ýmsar íþróttir sem krakki. Guðni Valur æfði með Aftureldingu á sínum yngri árum en keppir nú fyrir hönd ÍR undir dyggri handleiðslu Péturs Guðmundssonar.

Guðni Valur setur markið hátt á árinu og ætlar sér að komast á Heimsmeistaramótið í sumar og vinna Evrópumeistaramótið í sínum aldurshópi. Lágmarkið fyrir HM er 65 m en besti árangur Guðna er 63,5 m. „Ég á nóg inni og ætla mér stóra hluti.“ Þá er stefnan tekin á Smáþjóðaleika og fjölda annarra móta og keppnisferða á árinu.

Guðni Valur var á dögunum útnefndur frjálsíþróttakarl ársins og hlaut einnig titilinn íþróttakarl ÍR 2016. „Það er hrikalega skemmtilegt að bæta nafnbótinni Mosfellingur ársins við í safnið og mun ég bera titilinn stoltur,“ segir þessi framúrskarandi íþróttamaður sem vert verður að fylgjast með í náinni framtíð.

Sigrún Þ. Geirsdóttir hefur verið valin Mosfellingur ársins 2015.

Eftirfarandi texti er tekinn úr viðtali við Sigrúnu á mosfellingur.is:

Sigrún vann það þrekvirki á árinu 2015 að synda fyrst íslenskra kvenna yfir Ermarsundið. Sigrún sem hefur stundað sjósund undanfarin ár og hafði áður synt boðsund í tvígang yfir Ermarsundið sem varð kveikjan að því að hana langaði að gera þetta ein. Ermarsundið er stundum kallað „Mount Everest sundmanna,“ en að synda yfir sundið er eitt og sér mikið afrek, en þrekvirki Sigrúnar verður líklega seint leikið eftir. Bakgrunnur Sigrúnar í íþróttum er enginn og lærði hún skriðsund fyrir þremur árum síðan. Þetta afrek hennar er því ótrúlegt.

„Þetta er æðislegt, ég var tilnefnd sem maður ársins af ýmsum fjölmiðlum en það er ótrúlegur heiður að hljóta nafnbótina Mosfellingur ársins, það er svakalega skemmtilegt,“ segir Sigrún og bætir við að hún sé alltaf endurnærð þegar hún komi upp úr sjónum, skilji áreiti og áhyggjur eftir og finni fyrir meiri jarðtengingu.

Jóhanna Elísa Engelhartsdóttir, fyrsti sigurvegari Biggest Loser á Íslandi, hefur verið valin Mosfellingur ársins 2014.

„Það hefur orðið kúvending í mínu lífi og árið 2014 var vægast sagt viðburðaríkt. Ég fór að hugsa um heilsuna og setti sjálfa mig í fyrsta sætið. Ég hugsaði mig ekki tvisvar um þegar ég skráði mig í The Biggest Loser og ætlaði mér frá byrjun að vinna þetta,“ segir Jóhanna.

Jóhanna léttist um rúm 52 kg og hafði lést um 12 kg áður en þættirnir hófust.

„Næsta skref er að hjálpa öðrum,“ segir Jóhanna sem stefnir að því að útskrifast sem einkaþjálfari í vor.

Hljómsveitin KALEO hefur verið valin Mosfellingur árins 2013.

KALEO skipa þeir Jökull Júlíusson, Davíð Antonsson, Daníel Ægir Kristjánsson og Rubin Pollock. Hljómsveitin sló rækilega í gegn á árinu 2013 með útgáfu sinni af laginu Vor í Vaglaskógi. Lagið kom þeim á kortið í tónlistarheiminum og hafa þeir verið óstöðvandi síðan.

„Við erum gríðarlega stoltir að hljóta þessa nafnbót og má segja að þetta setji punktinn yfir i-ið á árinu 2013 sem hefur verið ævintýri líkast," segja strákarnir í samtali við Mosfelling.

KALEO gáfu út sína fyrstu plötu á árinu sem seldist vel auk þess sem Jökull söngvari var tilnefndur til íslensku tónlistarverðlaunanna sem söngvari ársins.

Söngkonan og fiðluleikarinn Greta Salóme Stefánsdóttir hefur verið valin Mosfellingur ársins 2012.

Árið 2012 var sannkölluð rússíbanareið hjá Gretu Salóme frá því að hún sigraði forkeppni Eurovision hér heima í febrúar með laginu Mundu eftir mér. Greta samdi lagið og textann sjálf og flutti það ásamt Jóni Jósep Snæbjörnssyni. Greta og Jónsi sungu sigurlagið á stóra sviðinu í Baku í Aserbaídsjan og komust áfram á úrslitakvöld söngvakeppni Eurovision.

„Þetta er frábær viðurkenning. Mér þykir afskaplega vænt um bæinn minn og hef fundið fyrir miklum stuðningi frá Mosfellingum. Allt sem hefur verið í gangi hjá mér síðustu árin er að mörgu leyti Mosfellsbæ að þakka og hafa bæjaryfirvöld í Mosfellsbæ stutt ótrúlega vel við bakið á mér,“ segir Greta Salóme í samtali við bæjarblaðið Mosfelling.

Greta Salóme gaf út sína fyrstu plötu í desember sem ber titilinn In The Silence og hefur hún fengið mjög góð viðbrögð. Fyrir jólin var hún ein aðalstjarnan í Frostrósum. Þá kláraði Greta mastersnám í tónlist frá Listaskóla Íslands í maí síðastliðnum og stefnir jafnvel á doktorsnám með haustinu. Greta spilar einnig með Sinfóníuhljómsveit Íslands og æfir Crossfit af kappi.

Fótboltamamman og athafnakonan Hanna Símonardóttir hefur verið valin Mosfellingur ársins 2011

Hanna hefur um árabil verið ein aðal driffjöðurin í starfi Aftureldingar. Hún er ma. upphafsmaður risa þorrablóts Aftureldingar í þeirri mynd sem það er í dag auk þess sem hún á veg og vanda að knattspyrnuskóla Aftureldingar og Liverpool.

„Lífið er fótbolti,“ segir Hanna Símonardóttir sem tileinkar Aftureldingu nafnbótina eftir 14 ára starf sem sjálfboðaliði í þágu félagsins.

„Mitt hjartans mál er að byggt verði knattspyrnuhús í Mosfellsbæ,” segir Hanna Símonardóttir sem er hvergi nærri hætt að láta got að sér leiða fyrir Aftureldingu og samfélagið í Mosfellsbæ.

Steinþór Hróar Steinþórsson, betur þekktur sem Steindi Jr., hefur verið valinn Mosfellingur ársins 2010

Steindi hefur slegið rækilega í gegn í nýrri gamanþáttaröð á Stöð 2 sem nefnist Steindinn okkar. Í kjölfarið átti hann vinsælasta lag landsins, var andlit auglýsingaherferða og er orðinn þekkt andlit í íslensku gríni.

Steindi hefur alla tíð lagt áherslu á Mosfellsbæ í sinni þáttagerð og fær bæjarbúa óhikað í lið með sér en einnig hefur leikfélagið verið honum hjálplegt.

“Þetta er einn mesti heiður sem ég hef hlotið,” segir Steindi og bætir við að hann sé stoltur Mosfellingur.

Embla Ágústsdóttir er Mosfellingur ársins 2009.

Embla lætur hreyfihömlun ekki hindra sig í að lifa lífinu og ná háleitum markmiðum sínum í námi og starfi. Með því að miðla af reynslu sinni og lífssýn hefur hún unnið að því að breyta viðhorfum til fatlaðra og fengið fólk til að skilja að þó hreyfihömlun sé áskorun þá sé hún ekki endilega afsökun.

Embla hefur að undanförnu haldið fjölda fyrirlestra sem tengjast málefnum fatlaðra. Embla er nemandi á félagsfræðibraut í Borgarholtsskóla og stefnir á háskólanám í fötlunar- og kynjafræðum.

Mosfellingur ársins 2008 er athafnamaðurinn og hóteleigandinn Albert Sigurður Rútsson.

Á árinu opnaði Albert glæsilegt hótel í Mosfellsbæ, Hótel Laxnes. Alli Rúts, eins og hann er oftast kallaður er landskunnur skemmtikraftur og rak á árum áður eina þekktustu bílasölu landsins.

Hótel Laxnes er með glæsilegri byggingum í Mosfellsbæ en hótelið opnaði í byrjun septembermánaðar.

Jóhann Ingi Guðbergsson, sundlaugarvörður í Lágafellslaug, er Mosfellingur ársins 2007.

Jóhann Ingi bjargaði lífi tveggja ára stúlku sem hafði verið á kafi í tæpar tvær mínútur áður en endulífgun hófst. Hann gafst ekki upp þrátt fyrir lítinn árangur í fyrstu en eftir ítrekaðar tilraunir komst hún til meðvitundar. Jóhann Ingi hafði nýlokið skyndihjálparnámskeiði og átti ekki von á því að þurfa nýta þessa kunnáttu eftir að hafa starfað í einungis viku við sundlaugina. „Þetta er kraftaverki líkast og þessi atburður á seint eftir að líða mér úr minni. Það besta við þetta er að stúlkunni varð ekki meint af.” Jóhann Ingi er 18 ára gamall og mælir hiklaust með því að fólk læri skyndihjálp og kunni að nota hana.

Kraftakarlinn og kerfisfræðingurinn landsþekkti Hjalti „Úrsus” Árnason er Mosfellingur ársins 2006.

Hjalti er einn mesti afreksmaður landsins í kraftlyftingum og hefur unnið til fjölda titla sem slíkur, bæði hérlendis sem og erlendis. Undanfarin ár hefur hann lagt metnað sinn í að skrásetja sögu eins þekktasta aflraunamanns Íslands, Jóns Páls Sigmarssonar. Heimildarmyndin Þetta er ekkert mál (2006) var ein mest sótta mynd ársins og var m.a. tilnefnd til Edduverðlaunanna. Sala myndarinnar á DVD fór í gullsölu sem er ótvírætt merki þess að myndin hafi fallið í góðan jarðveg. „Það er von mín að minningin um Jón Pál, þennan frábæra félaga og vin, gleymist aldrei”, sagði Hjalti.

Að lokum vildi Hjalti bæta við að sú nafnbót að vera Mosfellingur ársins væri sannur heiður: „Þetta er mikil viðurkenning fyrir mig og heiður," sagði Hjalti „Úrsus" Árnason, kraftlyftingamaður.

Fyrstur til að hljóta heiðurstitilinn "Mosfellingur ársins" er Sigsteinn Pálsson fyrrverandi bóndi á Blikastöðum. Sigsteinn gegndi á árum áður fjölmörgum trúnaðarstörfum í bæjarfélaginu ásamt því að vera stórbóndi á Blikastöðum, bænum sem hann er ávallt kenndur við.

Sigsteinn stóð á tímamótum á nýliðnu ári en þann 16. febrúar fagnaði hann 100 ára afmæli sínu. Sigsteinn er elsti íbúi Mosfellsbæjar og hefur í gegnum árin verið mjög ern.